PGK NEWS:-ಹೊಸದಿಲ್ಲಿ: ಏಕರೂಪ ನಾಗರಿಕ ಸಂಹಿತೆ (ಯುಸಿಸಿ) ಕುರಿತಂತೆ ಆತುರದ ನಿರ್ಧಾರ ತೆಗೆದುಕೊಳ್ಳದಿರಲು ಕಾಂಗ್ರೆಸ್ ತೀರ್ಮಾನಿಸಿದೆ. ವೈಯಕ್ತಿಕ ಕಾನೂನುಗಳ ಕುರಿತು ಚರ್ಚಿಸಲು ಜುಲೈ 3ರಂದು ಕಾನೂನು ಮತ್ತು ನ್ಯಾಯಾಂಗ ಸಚಿವಾಲಯದ ಸಂಸದೀಯ ಸ್ಥಾಯಿ ಸಮಿತಿ ಸದಸ್ಯರು ಸಭೆ ಸೇರಲಿದ್ದಾರೆ. ಆದರೆ ಅವರಿಗೆ 21ನೇ ಕಾನೂನು ಆಯೋಗವು 'ಕೌಟುಂಬಿಕ ಕಾನೂನಿನ ಪರಾಮರ್ಶೆ' ಕುರಿತಾಗಿ ನೀಡಿದ ವರದಿಯು 'ಸಮಾನ ನಾಗರಿಕ ಸಂಹಿತೆಯು ಅವಶ್ಯಕವೂ ಅಲ್ಲ, ಈ ಹಂತದಲ್ಲಿ ಅಪೇಕ್ಷಣೀಯವೂ ಅಲ್ಲ' ಎಂದು ಹೇಳಿರುವುದಾಗಿ ಕಾಂಗ್ರೆಸ್ ಮೂಲಗಳು ತಿಳಿಸಿವೆ.
ಈಗಿನ 22ನೇ ಕಾನೂನು ಆಯೋಗವು ವೈಯಕ್ತಿಕ ಕಾನೂನುಗಳ (ಯುಸಿಸಿ) ಕುರಿತಾದ ತನ್ನ ವರದಿಯನ್ನು ಇನ್ನೂ ಸಲ್ಲಿಸಿಲ್ಲ. ಈ ವಿಚಾರದಲ್ಲಿ ಕಾನೂನು ಆಯೋಗ ಮತ್ತು ಕೇಂದ್ರ ಕಾನೂನು ಸಚಿವಾಲಯದ ಅಭಿಪ್ರಾಯಗಳಿಗಾಗಿ ಕಾದು ನೋಡಲು ಕಾಂಗ್ರೆಸ್ ಉದ್ದೇಶಿಸಿದೆ ಎನ್ನಲಾಗಿದೆ.
ಏಕರೂಪ ನಾಗರಿಕ ಸಂಹಿತೆ ಕುರಿತಂತೆ ಕಾನೂನು ಆಯೋಗ ಅಥವಾ ಕಾನೂನು ಸಚಿವಾಲಯದ ಬೇರೆ ಯಾವುದೇ ವರದಿಯನ್ನು ಸಂಸದೀಯ ಸಮಿತಿ ಸದಸ್ಯರಿಗೆ ನೀಡಿಲ್ಲ ಎಂದು ಮೂಲಗಳು ಹೇಳಿವೆ.
ವೈಯಕ್ತಿಕ ಕಾನೂನುಗಳ ಪರಾಮರ್ಶೆ' ಕುರಿತಂತೆ ತಮ್ಮ ಅಭಿಪ್ರಾಯಗಳನ್ನು ಹಂಚಿಕೊಳ್ಳಲು ಕಾನೂನು ವ್ಯವಹಾರಗಳ ಇಲಾಖೆ, ಶಾಸನ ಇಲಾಖೆ ಮತ್ತು ಕಾನೂನು ಆಯೋಗದ ಸದಸ್ಯರಿಗೆ ಸಮಿತಿ ಆಹ್ವಾನ ನೀಡಿದೆ. ಸಮಾನ ನಾಗರಿಕ ಕಾನೂನು ಈ ಸಂದರ್ಭದಲ್ಲಿ ಉಚಿತವಲ್ಲ ಎಂದು ಶನಿವಾರ ಪ್ರತಿಪಾದಿಸಿರುವ ಕಾಂಗ್ರೆಸ್, ಈ ವಿಚಾರದ ಬಗ್ಗೆ ಕರಡು ಮಸೂದೆ ಅಥವಾ ಒಂದು ವರದಿ ಬಂದರೆ ಮುಂದಿನ ಪ್ರತಿಕ್ರಿಯೆ ನೀಡುವುದಾಗಿ ಹೇಳಿದೆ.
ಪಕ್ಷದ ಉನ್ನತ ನಾಯಕತ್ವವು ತನ್ನ ಸಂಸದೀಯ ಕಾರ್ಯತಂತ್ರ ಗುಂಪಿನ ಸಭೆ ನಡೆಸಿದೆ. ಅದರಲ್ಲಿ, ಜುಲೈ 20ರಿಂದ ಆರಂಭವಾಗಲಿರುವ ಸಂಸತ್‌ನ ಮುಂಗಾರು ಅಧಿವೇಶನದಲ್ಲಿ ಪ್ರಸ್ತಾಪಿಸಬೇಕಿರುವ ವಿವಿಧ ವಿಷಯಗಳ ಬಗ್ಗೆ ಚರ್ಚೆ ನಡೆಸಲಾಗಿದೆ.ಕರಡು ಹಾಗೂ ಚರ್ಚೆ ಇದ್ದಾಗ, ನಾವು ಭಾಗವಹಿಸಿ ಏನನ್ನು ಪ್ರಸ್ತಾಪಿಸಲಾಗಿದೆ ಎಂಬುದನ್ನು ನಾವು ಪರಿಶೀಲಿಸುತ್ತೇವೆ. ಸದ್ಯಕ್ಕೆ ನಮ್ಮ ಬಳಿ ಇರುವುದು ಪ್ರತಿಕ್ರಿಯೆಗಳಿಗಾಗಿ ಕಾನೂನು ಆಯೋಗ ಹೊರಡಿಸಿರುವ ನೋಟಿಸ್ ಮಾತ್ರ. ಹೊಸತಾಗಿ ಏನೂ ನಡೆಯದೆ ಇರುವುದರಿಂದ ಕಾಂಗ್ರೆಸ್ ಈ ಹೇಳಿಯನ್ನು ಪುನರುಚ್ಚರಿಸುತ್ತದೆ" ಎಂದು ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಜೈರಾಂ ರಮೇಶ್ ತಿಳಿಸಿದ್ದಾರೆ.
ಕಾಂಗ್ರೆಸ್ ಮತ್ತು ಅದರ ನಾಯಕರು ವಿಹ್ವಲರಾಗುತ್ತಿದ್ದಾರೆ. ಎಲ್ಲರನ್ನೂ ಒಗ್ಗಟ್ಟಾಗುವುದು ಮತ್ತು ಈ ಕಾನೂನನ್ನು ತರುವುದು ಈ ಸಮಯದ ಅಗತ್ಯವಾಗಿದೆ. ಇದನ್ನು 70 ವರ್ಷಗಳ ಹಿಂದೆ ಸಂವಿಧಾನದ ಕರ್ತೃಗಳು ಕೂಡ ಹೇಳಿದ್ದರು. ಐದು ವಿಭಿನ್ನ ವಿಚಾರಣೆಗಳಲ್ಲಿ ಸುಪ್ರೀಂಕೋರ್ಟ್ ಸಹ ಯುಸಿಸಿ ಜಾರಿಗೆ ತರುವ ಬಗ್ಗೆ ಮಾತನಾಡಿತ್ತು" ಎಂದು ಕೇಂದ್ರ ಸಚಿವ ಪಿಯೂಷ್ ಗೋಯಲ್ ಕಾಂಗ್ರೆಸ್ ವಿರುದ್ಧ ಹರಿಹಾಯ್ದಿದ್ದಾರೆ. ದೇಶದ ಬಹುತೇಕ ರಾಜಕೀಯ ಪಕ್ಷಗಳು ಕೂಡ ದೇಶವನ್ನು ಒಂದುಗೂಡಿಸುವ ಕಾನೂನನ್ನು ಬಯಸಿವೆ ಎಂದು ಗೋಯಲ್ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
