PGK NEWS ಪಶ್ಚಿಮ ಘಟ್ಟ ವಾಯ್ಸ್:-ಶಿರಸಿ:
ರಾಜ್ಯದ ಪ್ರಸಿದ್ಧ ಇಲ್ಲಿಯ ಟಿಎಸ್‌ಎಸ್‌ ಸಹಕಾರಿ ಸಂಸ್ಥೆ ಆಡಳಿತ ಮಂಡಳಿಯನ್ನು ರದ್ದುಗೊಳಿಸಿದ ಸಹಕಾರ ಇಲಾಖೆ ಕ್ರಮದ ವಿರುದ್ಧ ನೂರಾರು ಸದಸ್ಯರು ಶನಿವಾರ ಪ್ರತಿಭಟನೆ ನಡೆಸಿದರು.
ಸಂಸ್ಥೆಯ ಆವರಣದಲ್ಲಿ ಸೇರಿದ ಬೆಳೆಗಾರ ಸದಸ್ಯರು ಸಂಸ್ಥೆಗೆ ವಿಶೇಷ ಆಡಳಿತಾಧಿಕಾರಿ ನೇಮಕ ಮಾಡಿರುವುದಕ್ಕೆ ಆಕ್ರೋಶ ವ್ಯಕ್ತಪಡಿಸಿದರು. ನಂತರ ಶಾಸಕ ಭೀಮಣ್ಣ ನಾಯ್ಕ ಅವರನ್ನು ಭೇಟಿಯಾದ ಆಡಳಿತ ಮಂಡಳಿ ಪ್ರಮುಖರು ಮತ್ತು ಸದಸ್ಯರು ಇಂತಹ ಕ್ರಮ ಕೈಗೊಂಡ ಸಹಕಾರ ಸಂಘಗಳ ಜಿಲ್ಲಾ ಉಪನಿಬಂಧಕರನ್ನು ಇಲ್ಲಿಗೆ ಕರೆಸಿ ವಿವರಣೆ ಕೊಡಿಸಬೇಕು ಎಂದು ಆಗ್ರಹಿಸಿದರು.
ಈ ಸಂದರ್ಭದಲ್ಲಿ ಆಡಳಿತ ಮಂಡಳಿ ನಿಕಟಪೂರ್ವ ಅಧ್ಯಕ್ಷ ಗೋಪಾಲಕೃಷ್ಣ ವೈದ್ಯ ಮತ್ತು ನಿಕಟಪೂರ್ವ ಉಪಾಧ್ಯಕ್ಷ ಎಂಎನ್‌ ಭಟ್ಟ ಮಾತನಾಡಿ, ಸಹಕಾರ ಸಂಘಗಳ ಉಪನಿಬಂಧಕರ ಆದೇಶದ ಕುರಿತು ತೀವ್ರ ಆಕ್ಷೇಪ ವ್ಯಕ್ತಪಡಿಸಿದರು. "ಸಂಸ್ಥೆಗೆ ಕಳೆದ ವರ್ಷ ಆಗಸ್ಟ್‌ ತಿಂಗಳಲ್ಲಿ ನಡೆದ ಚುನಾವಣೆಯಲ್ಲಿ ಪಾಲ್ಗೊಂಡ ಸಾವಿರಾರು ಸದಸ್ಯರು 15ರಲ್ಲಿ 14 ಸ್ಥಾನಗಳನ್ನು ನಮ್ಮ ಬಳಗದ ಸ್ಪರ್ಧಿಗಳು ಗೆಲ್ಲುವಂತೆ ಮಾಡಿದ್ದಾರೆ. ಅದಾದ ನಾಲ್ಕು ದಿನಗಳ ನಂತರ ಚುನಾವಣೆಯಲ್ಲಿ ಸೋತ ಒಬ್ಬರು ಮತ್ತು ಇತರರು ಸೇರಿಕೊಂಡು ಚುನಾವಣೆ ಸರಿಯಾಗಿ ನಡೆದಿಲ್ಲ ಎಂಬ ಕಾರಣವನ್ನು ಮುಂದಿಟ್ಟು ಉಪನಿಬಂಧಕರಿಗೆ ತಕರಾರು ಅರ್ಜಿ ಸಲ್ಲಿಸಿದರು. ಆದರೆ ಚುನಾವಣೆ ನಡೆಸಿದ್ದು ಹಳೆಯ ಆಡಳಿತ ಮಂಡಳಿಯ ಕಾಲದಲ್ಲಿ. ಅದಕ್ಕೆ ಅವರೇ ಜವಾಬ್ದಾರಿ ಆಗುತ್ತಾರೆ. ಆದರೆ ಉಪನಿಬಂಧಕರು ಈಗ ನಮ್ಮ ಆಡಳಿತ ಮಂಡಳಿಯನ್ನು ರದ್ದು ಮಾಡಿದ್ದಾರೆ," ಎಂದು ಆರೋಪಿಸಿದರು.
ಬೆಳವಣಿಗೆಯಿಂದ ಟಿಎಸ್‌ಎಸ್‌ ಸದಸ್ಯರು, ಅಭಿಮಾನಿಗಳು ಹಾಗೂ ಗ್ರಾಹಕರು ಆತಂಕಗೊಳ್ಳಬೇಕಾಗಿಲ್ಲ. ನಮ್ಮ ಮುಂದಿನ ಕ್ರಮದ ಬಗ್ಗೆ ಕಾನೂನು ಸಲಹೆಗಾರರನ್ನು ಕೇಳಿ ಮುನ್ನಡೆಯುತ್ತೇವೆ. ಸದಸ್ಯರಿಗೆ ತೊಂದರೆಯಾಗುವ ಹೆಜ್ಜೆ ಇಡುವುದಿಲ್ಲ. ಹಾಗೆ ಆಗುತ್ತದೆ ಅಂದರೆ ಮುಂದಿನ ಚುನಾವಣೆ ಎದುರಿಸುತ್ತೇವೆ," ಎಂದರು.
ರಾಜ್ಯದ ಪ್ರಸಿದ್ಧ ಸಹಕಾರಿ ಸಂಸ್ಥೆಗಳಲ್ಲಿ ಒಂದಾದ ಶಿರಸಿಯ ಟಿಎಸ್‌ಎಸ್‌ ಆಡಳಿತ ಮಂಡಳಿ ರದ್ದಿಗೆ ಆಕ್ರೋಶ
ಮಂಡಳಿಯನ್ನು ರದ್ದುಗೊಳಿಸಿದ ಸಹಕಾರ ಇಲಾಖೆ ಕ್ರಮದ ವಿರುದ್ಧ ನೂರಾರು ಸದಸ್ಯರಿಂದ ಪ್ರತಿಭಟನೆ
ಸಂಸ್ಥೆಯ ಆವರಣದಲ್ಲಿ ಸೇರಿದ ಬೆಳೆಗಾರ ಸದಸ್ಯರಿಂದ ಸಂಸ್ಥೆಗೆ ವಿಶೇಷ ಆಡಳಿತಾಧಿಕಾರಿ ನೇಮಕಕ್ಕೆ ವಿರೋಧ
ಶಾಸಕ ಭೀಮಣ್ಣ ನಾಯ್ಕ ಅವರಿಗೆ ಸಹಕಾರ ಸಂಘಗಳ ಜಿಲ್ಲಾ ಉಪನಿಬಂಧಕರನ್ನು ಕರೆಸಿ ವಿವರಣೆ ಕೊಡಿಸುವಂತೆ ಆಗ್ರಹ
ಶಿರಸಿ: ಶತಮಾನ ಕಂಡ ರೈತರ ಜೀವನಾಡಿಯಾದ, ಅನೇಕ ಹಿರಿಯರ ಪರಿಶ್ರಮದಿಂದ ಕಟ್ಟಿದ, ರಾಜ್ಯದಲ್ಲಿ ಪ್ರತಿಷ್ಠಿತ ಸಹಕಾರಿ ಸಂಸ್ಥೆಯಾದ ತೋಟಗಾರ್ಸ್‌ ಕೋ ಆಪರೇಟಿವ್‌ ಸೇಲ್‌ ಸೊಸೈಟಿಗೆ ಏಕಾಏಕಿ ಆಡಳಿತಧಿಕಾರಿಯನ್ನು ನೇಮಿಸಿ ಅದೇಶಿಸಿದ್ದು ಅನೇಕ ಸಂಶಯಕ್ಕೆ ಕಾರಣವಾಗಿದೆ. ಪ್ರಜಾಪ್ರಭುತ್ವ ರೀತಿ ಆಯ್ಕೆಯಾದ ಜನಪ್ರತಿನಿಧಿಗಳ ಹಕ್ಕನ್ನು ಮೊಟಕುಗೊಳಿಸಿ ಹಠಾತ್‌ ಆಡಳಿತಧಿಕಾರಿ ನೇಮಿಸಿದ್ದು ಪ್ರಜಾಪ್ರಭುತ್ವದ ಕಗ್ಗೊಲೆಯಾಗಿದೆ ಎಂದು ಮಾಜಿ ಸ್ಪೀಕರ್‌ ವಿಶ್ವೇಶ್ವರ ಹೆಗಡೆ ಕಾಗೇರಿ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಈ ಕುರಿತು ಪತ್ರಿಕಾ ಹೇಳಿಕೆ ನೀಡಿರುವ ಅವರು, ಚುನಾವಣಾ ಪ್ರಕ್ರಿಯೆಯಲ್ಲಿ ಲೋಪದೋಷವಾಗಿದೆ ಎಂದು ಬಿಂಬಿಸಿ ಪ್ರತಿಷ್ಠಿತ ಸಂಸ್ಥೆಯ ಮೇಲೆ ಈ ರೀತಿ ಕ್ರಮವಾಗಿದ್ದು ಯಾರ ಕೈವಾಡ ಎಂಬುದು ಜನಸಾಮಾನ್ಯ ರೈತರ ಪ್ರಶ್ನೆಯಾಗಿದೆ. ಚುನಾವಣೆ ಪ್ರಕ್ರಿಯೆಯಲ್ಲಿ ತಪ್ಪಾಗಿದ್ದಲ್ಲಿ ಅದನ್ನು ನಿರ್ವಹಿಸಿದ ಅಧಿಕಾರಿಗಳ ಮೇಲೆ ಕ್ರಮಕೈಕೊಳ್ಳುವುದನ್ನು ಬಿಟ್ಟು ಅಧಿಕೃತ ಚುನಾಯಿತ ಪ್ರತಿನಿಧಿಗಳನ್ನು ವಜಾಮಾಡಿರುವುದು ಸಹಕಾರಿ ತತ್ವಕ್ಕೆ ಅಪಮಾನ ಮಾಡಿದಂತಾಗಿದೆ. ಈಗಾಗಲೇ ಸಂಘದಲ್ಲಿ ನಡೆದಿದೆ ಎನ್ನಲಾದ ಅವ್ಯವಹಾರ ದೂರಿನ ವಿಚಾರಣೆಗೆ ಅಡ್ಡಿಪಡಿಸಲಿಕ್ಕಾಗಿ ಆಡಳಿತ ಮಂಡಳಿಯನ್ನು ವಜಾ ಮಾಡಲಾಯಿತೇ ಎಂಬ ಅನುಮಾನ ಮೂಡುವಂತಾಗಿದೆ ಎಂದು ದೂರಿದ್ದಾರೆ.