ಪಶ್ಚಿಮಘಟ್ಟ ವಾಯ್ಸ್ ಡೈಲಿ ನ್ಯೂಸ್:-
ಆಯನೂರು ಸಮೀಪದ ವೀರಗಾರನ ಬೈರನಕೊಪ್ಪ ಗ್ರಾಮದಲ್ಲಿ ವಿದ್ಯುತ್‌ ತಗುಲಿ ಗಂಡು ಕಾಡಾನೆ ಮೃತಪಟ್ಟಿದೆ. ಇದಕ್ಕೆ ಶಿವಮೊಗ್ಗ ವನ್ಯಜೀವಿ ವಿಭಾಗದ ಮೇಲಧಿಕಾರಿಗಳೇ ನೇರ ಹೊಣೆಗಾರರೆಂದು ಆರೋಪಿಸಲಾಗಿದೆ. ಕಾಡಾನೆಯ ಶವ ಪರೀಕ್ಷೆಯನ್ನು ನಿಯಮಬಾಹಿರವಾಗಿ ನಿರ್ವಹಿಸಲಾಗಿದೆ. ಕಾನೂನಿನ ಪ್ರಕಾರ ಪಂಚರು, ವನ್ಯಜೀವಿ ವೈದ್ಯರು, ಸರಕಾರೇತರ ಸಂಸ್ಥೆಗಳು ಬಂದು ಸ್ಥಳ ಪರೀಕ್ಷೆ ಮಾಡುವುದಕ್ಕೆ ಪೂರ್ವದಲ್ಲೇ ಶವವನ್ನು ಅಕ್ರಮವಾಗಿ ಸ್ಥಳಾಂತರಗೊಳಿಸಿ, ನಂತರದಲ್ಲಿ ಶವ ಪರೀಕ್ಷೆ ನಡೆಸಲಾಗಿದೆ.
ಶಿವಮೊಗ್ಗ : ತಾಲೂಕಿನ ಆಯನೂರು ಸಮೀಪದ ವೀರಗಾರನ ಬೈರನಕೊಪ್ಪ ಗ್ರಾಮದಲ್ಲಿ ವಿದ್ಯುತ್‌ ತಂತಿ ತಗುಲಿ ಮೃತಪಟ್ಟ ಕಾಡಾನೆಯ ಮರಣೋತ್ತರ ಪರೀಕ್ಷೆಯಲ್ಲಿ ಪ್ರಕ್ರಿಯೆ ಲೋಪವಾಗಿದೆ ಎಂಬ ಗಂಭೀರ ಆರೋಪ ಕೇಳಿ ಬಂದಿದೆ.
ನಿಯಮದ ಪ್ರಕಾರ, ಪಶುವೈದ್ಯರು ಬರುವ ಮುನ್ನ ಮೃತಪಟ್ಟಿರುವ ಆನೆಯನ್ನು ಬೇರೆಡೆ ಸ್ಥಳಾಂತರ ಮಾಡುವಂತಿಲ್ಲ. ಆದರೆ, ಅರಣ್ಯ ಇಲಾಖೆ ಮರಣೋತ್ತರ ಪರೀಕ್ಷೆಯ ಮುನ್ನಾ ದಿನವೇ ಆನೆಯ ಕಳೆಬರವನ್ನು ಜೆಸಿಬಿ ಸಹಾಯದಿಂದ ಬೇರೆಡೆಗೆ ಸ್ಥಳಾಂತರಿಸಿದೆ.
ಪ್ಯಾಟ್ರೋಲಿಂಗ್‌ ಇಲ್ಲದ್ದೂ ಸಲಗ ಸಾವಿಗೆ ಕಾರಣ:
ಆನೆಯ ಸೊಂಡಿಲು ಭಾಗಕ್ಕೆ ವಿದ್ಯುತ್‌ ತಂತಿ ತಗುಲಿದ್ದು, ಅದರ ಸಾವಿಗೆ ಇದೇ ಕಾರಣ ಎಂಬುದು ಮರಣೋತ್ತರ ಪರೀಕ್ಷೆಯಿಂದ ಖಚಿತಗೊಂಡಿದೆ. ಜಮೀನಿನಲ್ಲಿ ಬೆಳೆದಿರುವ ಮೆಕ್ಕೆಜೋಳ ರಕ್ಷಿಸುವುದಕ್ಕಾಗಿ ವಿದ್ಯುತ್‌ ತಂತಿ ಹಾಕಲಾಗಿದೆ.ಇಲಾಖೆಯ ಸಿಬ್ಬಂದಿ ನಿರಂತರವಾಗಿ ಇಂತಹ ಪ್ರದೇಶಗಳಲ್ಲಿ ಪ್ಯಾಟ್ರೋಲಿಂಗ್‌ ಮಾಡಬೇಕು. ಆದರೆ, ಮಾಡದಿರುವುದೂ ಆನೆಯ ಸಾವಿಗೆ ಕಾರಣ ಎಂಬುದು ಮೇಲ್ನೋಟಕ್ಕೆ ಕಂಡುಬರುತ್ತಿದೆ. ಆನೆ ಮೃತಪಟ್ಟು ಎರಡು ದಿನಗಳಾದರೂ ಗಮನಕ್ಕೆ ಬಾರದಿರುವುದೂ ಇಲಾಖೆಯ ನಿರ್ಲಕ್ಷ್ಯಕ್ಕೆ ಹಿಡಿದ ಕೈಗನ್ನಡಿಯಾಗಿದೆ.
ಮೃತಪಟ್ಟ ಆನೆಯ ಮರಣೋತ್ತರ ಪರೀಕ್ಷೆ ಮಾಡಬೇಕಾದರೆ, ಕಟ್ಟುನಿಟ್ಟಿನ ನಿಯಮಗಳಿವೆ. ಅವುಗಳನ್ನು ಕಡ್ಡಾಯವಾಗಿ ಪಾಲಿಸಬೇಕು. ಒಂದುವೇಳೆ, ಪಶುವೈದ್ಯಾಧಿಕಾರಿಗಳು ಬಂದು ಪರಿಶೀಲಿಸುವ ಮುನ್ನವೇ ಆನೆಯನ್ನು ಬೇರೆಡೆ ಸ್ಥಳಾಂತರಿಸುವುದು ತಪ್ಪು. ಜತೆಗೆ, ಅವುಗಳ ಹಲ್ಲಿನ ಎಣಿಕೆಯೂ ಆಗಬೇಕು. ನುರಿತ ಪಶುವೈದ್ಯಾಧಿಕಾರಿಯಿಂದಲೇ ಮರಣೋತ್ತರ ಪರೀಕ್ಷೆ ನಡೆಯಬೇಕೇ ವಿನಾ ಪಶುವೈದ್ಯಕೀಯ ವಿದ್ಯಾರ್ಥಿಗಳನ್ನು ಕರೆದೊಯ್ದು ಮಾಡುವಂಥದ್ದಲ್ಲ.
ಅಧಿಕಾರಿಗಳ ವಿರುದ್ಧ ಕ್ರಮಕ್ಕೆ ಆಗ್ರಹ
ಶಿವಮೊಗ್ಗ: ಆಯನೂರು ಸಮೀಪದ ವೀರಗಾರನ ಬೈರನಕೊಪ್ಪ ಗ್ರಾಮದಲ್ಲಿ ವಿದ್ಯುತ್‌ ತಗುಲಿ ಗಂಡು ಕಾಡಾನೆ ಮೃತಪಟ್ಟಿದ್ದು, ಇದಕ್ಕೆ ಶಿವಮೊಗ್ಗ ವನ್ಯಜೀವಿ ವಿಭಾಗದ ಮೇಲಧಿಕಾರಿಗಳೇ ನೇರ ಹೊಣೆಗಾರರೆಂದು ಆರೋಪಿಸಿರುವ ಸ್ವಾನ್‌ ಆ್ಯಂಡ್‌ ಮೆನ್‌ ಪ್ರಧಾನ ಕಾರ್ಯದರ್ಶಿ ಅಖಿಲೇಶ್‌ ಚಿಪ್ಪಳಿ, ಸಂಬಂಧಪಟ್ಟವರ ವಿರುದ್ಧ ಕ್ರಮಕೈಗೊಳ್ಳಬೇಕೆಂದು ಆಗ್ರಹಿಸಿದ್ದಾರೆ.ಅರಣ್ಯ ಸಚಿವ ಈಶ್ವರ ಖಂಡ್ರೆ ಅವರಿಗೆ ಇಮೇಲ್‌ ಮೂಲಕ ದೂರು ಸಲ್ಲಿಸಿರುವ ಇವರು, ಅಭಯಾರಣ್ಯದಲ್ಲಿ ಕಾಡಾನೆಗಳನ್ನು ಓಡಿಸುವ ಪ್ರಯತ್ನದ ಫಲವಾಗಿಯೇ ಕಾಡಾನೆ ಮೃತಪಟ್ಟಿದೆ ಎಂದು ಟೀಕಿಸಿದ್ದಾರೆ.
ವನ್ಯಜೀವಿ ವಿಭಾಗಕ್ಕೂ ಮತ್ತು ಅರಣ್ಯಕ್ಕೂ ಸಂಬಂಧಪಡದೇ ಇರುವ ಹಾಗೂ ವನ್ಯಜೀವಿಗಳ ಕುರಿತಾಗಿ ಜ್ಞಾನವೇ ಇಲ್ಲದ ಪಶು ಇಲಾಖೆಯ ವಿದ್ಯಾರ್ಥಿಗಳನ್ನು ಶವ ಪರೀಕ್ಷೆಗೆ ಬಳಸಿಕೊಂಡಿರುವುದು ಸಾರ್ವಜನಿಕ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿದೆ ಎಂದು ಮನವಿ ಪತ್ರದಲ್ಲಿ ತಿಳಿಸಿದ್ದಾರೆ.
